சு.நா.மாயவன் கவிதைகள்

கிழக்கு விடியுமா?

அட………என்னாத்தெ செய்வது கடவுளே – இங்கு

இவனோட வாழவும் முடியலே

நல்லதைச் சொன்னா மொறைக்கிறான் – இவன்

ஞாயத்தைக் கேட்டால் குரைக்கிறான்

பள்ளத்தைத் தனக்கே தோண்டுறான் – இந்த

பாருக்கு பாரமாய் வாழ்கிறான் – (அட……..)

நஞ்சைப் பாலுன்னு குடிக்கிறான் – அதை

நஞ்சுன்னு சொன்னா வெடிக்கிறான்

வஞ்சகரின் சூழ்ச்சியில் தேய்கிறான் – இவன்

வாயில்லாப் பூச்சியாக வாழ்கிறான். (அட….)

பதவிக்காக இனத்தையே விற்கிறான் – கொடும்

பாவிக்கு பல்லக்கு தூக்குறான்

உதைப்பவனைக் கண்டால் மிரளுறான் –இவன்

ஓணானைப் போல நிறம் மாறுறான்    (அட…..)

நல்லதைச் சொல்லவும் முடியல்லே – அதை

நாசுக்காய் சொன்னாலும் ஏறலே

கிள்ளினால் அழக்கூடத் தெரியல்லே – இவன்

கிழக்கெப்போ விடியுமுன்னு புரியல்லே.   (அட…..).